錫蘭檸茶...

Thu, 14 Aug 2008 04:21:54 GMT

最近瘋狂的愛上維他錫蘭檸檬茶...可能,真的因為名字而有先入為主的感覺...錫蘭檸茶的茶味較香,口感方面會較傳統維他檸茶更好入口,另外亦有一種真的茶餐廳的味道...感覺會比陽光茶餐廳檸茶系列更有茶餐廳味道...不過,暫時維他仍然未在官方網站作出介紹...暫時自己亦未為檸茶拍照...暫時還是看看普通維他檸茶的官方介紹好了...

http://www.vitasoy.com.hk/chi/product/tea001.html

飲食指南...

Fri, 12 Oct 2007 09:59:53 GMT

昨晚跟Shaman,Libby,EVA去左銅鑼灣食晚飯,我地去左位於海旁附近的海岸酒吧,雖然舖頭名係叫酒吧...但實際上係泰式料理,而且根據VIP卡的引述,仲係「泰國咖喱辣蟹專門店」!!好了,說回重點...由於我開會遲到的關係,所以佢點原本點菜的時候,我完全唔知點左咩野...總知...煮到埋嚟就食啦...頭盤係簡單的沙爹串燒,感覺並非太特別,口感及醬汁都普通,只是像沙爹王的小菜...反而接下來,要講一講蒜蓉炒菜(我忘記了是什麼菜...XD),味道香濃而並非味精之感,菜本身吸收左蒜香,而口感爽而不痴口...實在好耐無食咁好味的菜...推介...

接住落嚟的,就係炒飯(不知名炒飯...XD)青咖喱雞及冬陰功河粉...炒飯的配料十足,味道都算OK,只是份量對於4個人而言,有點細小...(因為原本好像是叫2人餐)

咖喱的味道濃厚,不過感覺並非太辣...個人感覺雞的口感普通,不算特別的嫩口,但勝在可以配合炒飯一齊食...冬陰功河粉,如果說是河粉,其實應該形容為寬條麵,因為好厚好大塊,結果全部沉底,而湯料算豐富,只是酸感重於辣感,個人偏好以辣為主,所以只屬一般...最後重點,當然就係蛋咖喱辣蟹!!!濃郁的蛋味與咖喱混和,每一啖入口的感覺係兩種不同的享受,蟹肉方面都算入味,而有嚼頭...個人建議,如果兩個人食飯的話,叫一客蛋咖喱辣蟹然後配一個炒飯及蒜蓉包,咁就已經相當Perfect...

如果搵我去食...我有VIP卡,食夠$100已經可以有九折,6點過後,滿$500仲可以免費有甜品...尋晚落樓,每位都只係$123,相當超值...

海岸酒吧

Seacoast Bar

地址 : 銅鑼灣告士打道269號地下
電話 : 2838 3751
http://www.openrice.com/big5/sr2.htm?shopid=19100

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

好,講完尋晚當然就講埋今日啦...今日出席LG Press...有女影之外,最重要當然就係有飯食,同埋有稿可以寫啦...嗱,我做人好分明,有稿寫放最後,係因為稿件份量重要,所以先押後來講,又話需份稿好似交比第二個負責...但總知今日我出席左,影左KiKi同埋食左飯就珍珠無咁珍啦...返回正題先,行程方面我個人好滿意啦...因為去左時代廣場12樓的食通天,咁貴野嚟嗎...點都要比個讚...等人睇到,都知我落過咀頭賣口乖,下次先有多餐食...係咪...XD

再次返回正題,今日LG帶我地去左12樓798 unit & co.食晏,本身我估計係屬於意大利菜,所以期待度自然增加(意大利,有分加o架!!!),裝修方面其實頗別緻,店口的門面其實很像外國的街舖設計,而燈光的配合讓人感覺舒服,同枱的記者都話氣氛一流,適合同女仔一齊嚟食野...而我身邊的牆壁,本身係一塊特大的黑板,上面寫明是日午餐,盲都睇得到...加上畫得靚靚的圖畫(連酒吧果邊都有畫o架,我用12倍打埋去影左4朵花花)...一行人就開心地點菜...(英文菜單...好彩我識沙律同埋肉眼扒啫...如果唔係就食蕉囉... ><)

可能因為人太多,所以餐飲嚟左後,等左好耐先開始有野食...我叫左一杯凍朱古力,上面的Cream好好味...但當我望完其他人的熱朱古力,個杯更加靚同感覺更加香濃果陣,對於選擇左飲凍朱古力,立即有種失落之感...頭盤首先係煙薰鴨肝雜菜沙律(唔好問我點解知,我只係根據碟上的內容,然後砌番個名出來...),雜菜方面新鮮爽口乃正常之事,只是醬料方面實在太少,感覺調味料不足,鴨肝本身不是我的喜歡之列,但是對於味道仍屬滿意,只是沙律中有幾粒像麵包的東西,好像有上湯浸透...我猜不出原本是什麼味道...

重頭部份當然就是要說的肉眼扒!!!由於我不懂菜單的內容,所以不知產地來源及品種,不過煎封保存肉汁,而口感仍有嫩滑的感覺,可能自己平常習慣味道濃郁的感覺,因此對於味道方面感覺略為清淡,不過就有著強烈的炭燒肉類質感,從咬落去的一瞬間於內身中透出來...配菜只是單的烤薯仔,沒什麼特別...反而最後甜品的雪糕,真的很喜歡...唯一只是覺得士多啤梨酸爆廠...全部記者都酸死左...-3-

今日好玩,隨左有女影,有野食...仲有野拎...繼上次收到精美的純黑餐巾後,今次收到一對好精美的高腳酒本,而且包裝在一個精美的盒內,放在枱頭之上...感覺我個位的格調又提升不少...全場每位總計係$130落樓,以價錢格調及質素而言,屬帶女朋友級數...一個月去一次好了...去太多會肉痛...

798 unit & Co.

地址 : 銅鑼灣勿地臣街1號時代廣場食通天12樓
電話 : 2506-0611

http://www.openrice.com/big5/sr2.htm?shopid=18711

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

最後由朋友介紹....係明報大廈B座有法國私房菜...訂位電話:25582877

本身我好少會寫野食,不過尋晚同今日都有好野食,所以有時間就曬下命咁啦...相就夜晚先Update...你地知啦...始終返工係做野,唔係寫食野嗎...寫野食,我去做飲食男女啦...係咪... XD

NiKItA＠當麥當勞遇上肯德基: 飲食

錫蘭檸茶...

飲食指南...